Bures boahtin Luohtegeavlái!
Luohtegeavlli ulbmilin lea áhpásmahttit luođi fas oassin iežamet deaivvademiid, fátmmastit dan iežamet gávnnademiide. Luohti ii gula dušše konseartalávddiide ja studioi, iige olmmoš dárbbaš artisttalaš čehppodaga juoigat.
Dilálašvuohta lágiduvvo lávus, Gilidálu Saivu šiljus
10.5. dii. 16:30
Guossohat gáfe
Dilálašvuohta lea sámegilliiDán friijalunddot dáhpáhusas mii juoiggadat ja háleštat dan birra, makkár sajádat ja doaibma luođis lea leamašan dolin, makkár oassái dat lea gártan otnábeaivve ja – mii dehálamos – makkár boahttevaš eallima mii luohtái hálidat.
Dus eai dárbbaš leat gárvves jurdagat dáid áššiid birra dahje Sámi Grand Prix -vuoitu, dehálamos ahte boađát juoiganmielain.
Jalvvi Niillas láidesta juoiggadaneahkeda, mii lea luohteberošteaddjiide oaivvilduvvon rabas juoiggadan- ja ságastallandilálašvuohta.
