Interreg Aurora prošeakta Sápmái Buorrin – Bistevaš boahtteáigi Sámi fitnodagaide lea ohcamin bargiid. Prošeavtta jođiha Suoma Sámiid Guovddášsearvi ovttas Sámiráđiin ja Sámi Duodji – Sameslojdstiftelsein.
Dán golmmajagáš áŋgiruššama áigumuš lea duoji ja sámi ealáhusaid nannen ja daid oinnolašvuođa ja márkaniidda beassama buorideapmi. Áigut viidáseappot ovddidit Sámi gálvomearkkaid Sámi Made ja Sámi Duodji, ja čalmmustahttit eakti Sámi buktagiid, doarjut duojáriid ja fidnohutkiid, ja loktet duodje- ja kulturealáhusaid profiilla.
Fitnodatdoallit ja start-up fitnodagat ožžot vejolašvuođa oažžut bargoneavuid olgoriikavuovdimii, gelbbolašvuođa huksenprográmmaid ja digitála oahppanreaidduid mat addet buoret ovdánaneavttuid sihke sisriikkalaččat ja riikkaidgaskasaččat. Go ovttastahttá árbevirolaš máhtu ođđaáigásaš reaidduiguin, de bargá Sápmái Buorrin prošeakta dan ovdii ahte nannet sámi servodagaid, ovddidat gievra ealáhusaid ja gáhttet sámi kultuvrra miehtá Sámi.
Fuomáš: Prošeavttas leat ohcanlahkái oktiibuot 5 virggi muhto dát guokte virggi leat čatnon Suoma Sámiid Guovddášsearvái ja bargit galget bargat Suoma bealde Sámis. Prošeakta ohcá maiddái bargiid Norgga ja Ruoŧa bealde Sámis. Čuovo liŋkkaid oažžut eanet dieđuid.
|
Barggut ja ovttasvástádusat:
Prošeavtta jođideaddji:
- Oppalaš ovddasvástádus prošeaktadoaimmaid jođiheamis ja čađaheamis.
- Raporteren ruhtadeddjiide njuolggadusaid mielde.
- Sihkkarastit buori ovttasbarggu prošeaktaosiid gaskka ja buot ovttasbargoguimmiiguin.
Prošeaktabargi:
- Doarjut prošeaktajođiheaddji hálddahuslaš doaimmaiguin.
- Váldit ovddasvástádusa muhtun osiin prošeavttas, ovdamearkka dihte ovddidit ja čađahit pilohta gávpogiid áŋgiruššama, mas Sámi gálvvomearkkat, servodatáŋgiruššan, márkanastin ja oainnusmahttin deattuhuvvo.
- Čađahit geavatlaš doaimmaid nugomat diehtočoahkkanemiid ja kurssaid, lágidit dáhpáhusaid ja gulahallat Sámi fitnodagaiguin ja berošteddjiiguin.
- Doarjut prošeavtta ulbmiliid ollašuhttima.
Eará barggut sáhttet leat fárus dárbbuid ja gelbbolašvuođa mielde. Ferte leat gearggus mátkkoštit.
Gelbbolašvuođa gáibádusat:
Mii ohcat kandidáhtaid geat barget nana sámi fitnodagaid, kulturealáhusaid ja servodaga nannema ovdii.
- Buorre máhtolašvuohta sámi servodaga birra gáibiduvvo, rájiidrasttideaddji oaidnu lea ovdamunnin.
- Gáibiduvvojit nana ovttasbargo-, gulahallan- ja čállinmáhttu, ja vel iešheanalašvuohta, ulbmillašvuohta ja proaktiivvalašvuohta.
- Prošeaktajođiheaddji virgái: Vurdojuvvo bargohárjáneapmi jođihit stuorát prošeavttaid duođaštuvvon bohtosiiguin.
- Prošeaktabargi virgái: Dát rolla gáibida nana máhttu gulahallat ja ovttasbargat olbmuiguin ja návccaid ovttastahttit servodagaid ja ovttasbargoguimmiid mat láidestit pilohta gávpot doaimmaid ovddosguvlui.
- Goappaš virggiin gáibiduvvo eaŋgalsgiela máhttu lassin ovtta dain váldo davviriikkalaš gielain. Máhttu ovtta sámegielas adnojuvvo ovdamunnin.
Virggi eavttut:
- Prošeavtta áigodat: 1.11.2025 – 31.10.2028
- Bálkká: soahpamuša mielde
- Báiki: Suoma bealde Sámis
Ohcamuš:
Mii váldit vuostá ohcamušaid čálalaččat eaŋgalasgillii, muhto sáhtát maiddái čállit ohcamuša davviriikkalaš gielain dahje sámegillii. Ohčamušas ferte čujuhit goabbá virgái lea ohcamin. Ohcamušat mildosiiguin galget sáddejuvvot čujuhussii:
saamelaisten.keskusjarjesto@gmail.com maŋimustá 22.9.2025
Oahppoduođaštusat ja bargoduođaštusat galget mielde ohcamis.
Eanet dieđuid sáhtát jearrat:
Enni Similä , SSG čálli – +358 40 419 9601 dahje enni.simila@saamicouncil.net
Dahje:
Christina Hætta , Sámiráđi kulturossodaga hoavda – +47 48021734
Johanna Njaita, Sámi Duodji Sameslöjdstiftelsen jođiheaddji, +46 70 591 28 93
| Sámiráđđi lea eaktodáhtolaš, sorjjasmeahttun kultuvrralaš ja politihkalaš ovttasbargoorgána sámi organisašuvnnaide Suomas, Norggas, Ruoššas ja Ruoŧas. Váldoulbmilin lea gozihit sámiid vuoigatvuođaid ja beroštumiid oktan álbmogin ja nannet sámiid oktiigullevašvuođa riikkarájiid rastá. Ráđđi bargá maiddái riikkaidgaskasaččat ovddidit ja suddjet sámiid ja eará álgoálbmogiid vuoigatvuođaid. Das leat njeallje ossodaga: Árktalaš ja birasáššit, olmmošvuoigatvuođat, kultuvra ja EU-áššit.
Suoma Sámiid Guovddášsearvi rs (suom. Suomen saamelaisten keskusjärjestö, SSG) lea vuođđuduvvon 1997 ja dat lea Suoma sámiid servviid gáhttoorganisašuvdna. SSG ulbmil lea ovttastahttit sámi álbmoga, sihkkarastit ja ovddidit sámi álbmoga, gielalaš, hálddahuslaš, ekonomalaš ja kultuvrralaš vuoigatvuođaid ja fuolahit guovddáš sámi áššiid nationála ja riikkaidgaskasaš oktavuođain. SSG:s leat dál gávcci lahttoorganisašuvnna. Sámi Duodji Sameslöjdstiftelsen ásahuvvui 1993 Ruoŧa Sámiid Riikkasearvi ja Same Ätnam servviid doaimmas. Dan ulbmilin lea duoji gáhtten, ovddideapmi ja doarjun. Sámi Duodji bargá dan ala ahte duodji boahtá oidnosii iešguđetlágan arenain, sihke gávppálaš ja kultuvrralaš arenain. Sámi Duoji vuođđojurdda lea, ahte duodji galgá leat iehčanas, doaibmat doarjjafunkšuvdnan ja aktiivvalaččat bargat duodjái laktaseaddji áššiiguin. |
